ዝንቱ ሐተታ ተመሥረተ ላዕለ ሐቲተ ቅኔ ዘሠለስቱ ሊቃውንተ ደላንታ፡፡ በዝኑቱ ርእስ ዘተመሥረተ ቦቱ ምክንያት ከመ ኢይጥፍኡ ቅኔያተ ሊቃውንተ ደላንታ እንበለ ይትዐወቅ በቍዔቶሙ፡፡ ወዐላማሁ ለዝንቱ ሐተታ ሐቲተ ቅኔ ዘሠለስቱ ሊቃውንተ ደላንታ ወአውፅኦተ መልእክተ ምስጢረ ቅኔ ዘተሰወረ እምውስተ ቅኔያት ውእቱ፡፡ ወአንሣእኩ ጥያቄያተ በውስተ ሐተታ እንዘ እብል ምንት ያስተራክቦ ለቅኔ ሊቃውንት ምስለ አርድእተ ነገረ መለኯት ወስብከተ ወንጌል፣ እፍ ይትከሠት በቍዔተ ቅኔ ሊቃውነተት ለፈጽሞተ ስራሕ ወለኢመንኖተ ግብር ዘመሰሉ ውእቶሙ፡፡ ወተገሱ መጻሕፍተ ሊቃውንት ባህላውያን ወዘመናውያን ዘተጽሕፈ በእንተ ቅኔ እንዘ ይትናጸር ተማሲሎቶሙ ወተለያልዮቶሙ ምስለ ግብረ ዚኣየ፡፡ ወተቃነዩ ጽሑፋተ ሐተታ ዘተጽሕፋ በእንተ ቅኔ ውስተ ባሕር ዳር ዩኒቨርሲቲ ወአዲስ አበባ እንዘ ይትናጸሩ ምስለ ዝንቱ ሐተታ፡፡ ወጥበበ ሐተታሁ ለዝንቱ ግብር ዓይነታዊ ጥበበ ሐተታ ውእቱ፡፡ ወመዛግብተ ምርዳእ ቃለ መጠይቅ ወነጽሮተ መዛግብት ውእቶሙ፡፡ ወተተኑተኑ ምርዳኣት በተራኪ ወበከሣቲ ጥበበ መተንትን፡፡ ለውሂብ አውሥኦተ ለጥያቄያት ተዘግቡ ፩፻፴ ቅኔያት፡፡ ወእምእሉ በወኪሌል ዘይብልዎ ለውዎተ ዐላማ ተኀርዩ ፴፭ ቅኔያት እምነ ሠለስቱ አርእስት (በእንተ ቅኔ ዘሥነ ምግባር፣ ሰቆቃው ወግብር) ለለ አሐደ መምህር፡፡ እምቅድመ ትንተና ቅኔያት ተገሰ በኀጺር ዜ኏ና ሕይወቶሙ ለሠለስቱ ሊቃውንት ወተተንተኑ ቅኔያቲሆሙ፡፡ ወእምድኅረ ተተንተን ቅኔያት ተዐውቀ በፍጻሜ ሐተታ ከመ ኮኑ በቋዕያነ ለአርድእተ ነገረ መለኯት ወስብከተ ወንጌል፣ ለአልህቆተ ሥነ ምግባር ወለናዝዞተ ስነ ልቡና ሰብእ እለ ሐዘኑ፣ ለንቅሀተ ኀሊና ወለአልህቆተ ምጣኔ ሀብት፣ ለፈጺሞተ ስራሕ ወለኢመንናተ ግብር፡፡ አኮ እሉ ባሕቲቶሙ ዘተረክቡ በትንተና፡፡ ዳዕሙ ተረክቡ ብዙኃነ ወዐቢያነ ነገራት ዘይሰናሰል ምስለ አርባዕቱ ርክበታት፡፡ ወበፍጻሜሁ ለዝንቱ ጽንዐተ ጽሑፍ ተገብረ ርክበ ሐተታ፣ ወምልአተ ሐሳብ ምስለ ኀጺር ወዕሙቅ ትንተና፡፡ እምድማሬ ዝንቱ አንጸርኩ ሐሳባተ ዘይትራከቡ ምሰለ ቅኔ ሊቃውንት ወዘኢተገሱ በዝንቱ ሐተታ በዘተለያለየ ምክንያት፡፡