Abstract:
ዝንቱ ጽንዐት ዘተገብረ ምሥሩት ላዕለ ርእስ ነገረ ዘይብል ነገረ መሣግረ ግሳት ዘግእዝ ወዐላማሁ ሐቲት ከመ ለምንት ይትረአይ ሥግረተ ግሳት ወተንትኖት ለእመ ኮኑ ፊደላት ዘያሠግርዎሙ፡፡ ወከመ መንሥኤ ሐተታ ኮኑ ኢተአመሮቶሙ ድሉት ለመሣግር ወከዊኖቶሙ ኢቀዋምያን በመጠኖሙ ለግሳት እለ ይትገሰሱ በፍናዉ ግስት እለ የዐብዩ እምነ አሐዱ ወእሉኒ አንሥኡ ጥያቄያት ይብሉ ምንታት ዉእቶሙ እለ ይሠግሩ መሣግር በዉስተ ርብሐ ግስ ወለምንት ይሠግሩ ግሳት እምነ አሐዱ ርእስ ኀበ ካልእ ርስእ ወዘተዘግቡ ምርዳአት ሐተታሁ በኀሢሠ መዝገብ ወበመጠይቅ ቃለ መጻሕፍተ ሰዋሰዉ ወገድላት ቅዱሳት ወድርሳናት ተኀሡ የኵኑ ከመ ቀዳማይያን አንቅዕተ ምርዳአት ወበከሣቲ አስተናጽሮታዊ ዘተተንተኑ እሉ ምርዳአት በከመ ከዊኖቱ ዐይነታዌ ዘዉገ ሐተታሁ ተቃነዩ ወተሐየጹ ጽሑፋት ሐተታ ዘተገብሩ በሊሉያን ሐታትያን ግእዝ ወቃላተ ዐዋዲሁ ለርባሐ ግስ እለ ይዛመዱ ምስለ ነገረ መሣግር ወበዝንቱ ሐተታ ተጠየቀ ቀዳማየ ከመ አኮ ፊደላት እለ ያሠግርዎሙ ለግሳት አላ ጠባይዐ መልእክቱ ዘይትኀሠሥ ይትኃለፍ ይሠግሩ እም ቤተ ቀተለ ኀበ ቤተ ቀደሰ ያርእዩ ከመ ተዉህቦ አጽንዖት ወእስትርኵብና አዉ ትጋሀ ለግብሩ ዘተከሥተ በግሱ ወካዕበ አይድዐ ግብረ ሐተታሁ ከመ ይሠግሩ ግሳት ለከዊነ ሰሓቢ ወኢሰሐቢ ግስ ወአርአያ ሐተታሁ ከመ ይትከሀሎሙ ለፊደላት ጒርዔ ወማንቍርት ይትነገሩ ልኀሉኃኒሆሙ ወጥቡቃኒሆሙ ወከመ አኮ በካልአይያን አናቅጽ ባሕቲቶሙ ዘይሠግሩ ግሳት አመ ሠግሪ ዳእሙ በቀዳማይሂ ሣልሳይሂ ራብዓይሂ አናቅጽሂ ንኡሳን ወካልአንሂ ቅጽላት ይሠግሩ በተፍጻምኒ አስተሐየጸ ሐሳቦ ከመ ይሄልዎ ለዝንቱ ግብረ ሐተታ አስተዋጽኦ በአንቅሖ ምሁራነ ግዕዝ ለተደማሪ ግብረ ሐተታ ላዕለ ቀመረ ግስ እምአንጻረ አርእስተ ወአዕማድ ወበሐሪመ ትምህርተ መሣግር ዘይትወሀብ በአብያተ ጉባኤ ዘቀኔ ፡፡
