ጥናቱ ዓብይ ዓላማ አድርጎ የተነሳው ያልታበሱ እንባዎች ልቦለድ ውስጥ ያሉ ገፀ ባህሪያት ፍላጎት እንዴት እንደተገለፀ ማሳየት የሚል ነው፡፡ አነሳሽ ምክንያቴ ከላካኒያን ንድፈ ሀሳብ አንፃር ከዚህ ጥናት በፊት ሁለት አጥኝዎች ጥናት ያደረጉ ቢሆንም ፍላጎት፣ ባይተዋርነት፣ ፋሎ-ሴንትሪዝም፣ ጁዊሶንስ እና ሳይኮ-ፓቶሎጂ የሚሉ ፅንሰ ሀሳቦች ላይ ትኩረት ያላደረጉ በመሆኑ ነው፡፡ ጥናቱ ዓይነታዊ የምርምር ዘዴን እና ቴክስት ትንተና ስልትን የተከተለ ነው፡፡ መረጃውን ለመሰብሰብም ቀዳሚና ካልአይ የመረጃ ምንጮች ጥቅም ላይ ውለዋል፡፡ በጥናቱ መሰረት ያልታበሱ እንባዎች በተሰኘው ልቦለድ ውስጥ ያሉ ገፀ-ባህሪያት ፍላጎታቸውን ለማሳካት የሌላውን ፍላጎት ችግር ውስጥ ሲከቱ እና ስለ ሌላ ምን አገባኝ በማለት ኢጎአቸውን ሲገነቡ ተስተውለዋል፡፡ በፍላጎታቸው እጦት ምክንያትም ገፀ-ባህሪያት ለባይተዋርነት ልምድ መፈጠር፣ ለኢጎ መፈጠር፣ ለመገለልና እውነታን ላለመቀበል ሲጥሩ ታይተዋል፡፡ ገፀ- ባህሪያቱ ከተፈጠረባቸው ድብርት ለመውጣትና የፍላጎት እርካታቸውን ለመሙላት የወሲብ ግንኙነት ሲፈጽሙ፣ ጫት በመቃም ከደስታ በላይ የሆነ ደስታ ለማግኘት ጁዊሶንሳቸውን ሲሞሉ ይታያሉ፡፡ ሴት ገፀ- ባህሪያት ባለው አባዊ ስርዓት ምክንያት ውስጣዊ ፍላጎታቸውና ድብቅ ማንነታቸውን ለመግለፅ ሲቸገሩ የታዩ ሲሆን በዚህም የፋሎ ሴንትሪዝም ፅንሰ ሀሳብ በተግባር መከሰቱ በጥናቱ ተረጋግጧል፡፡ በመጨረሻም ጥናቱ ያረጋገጠው ገፀ ባህሪያት በፍላጎት እጦት ምክንያት በእንቅልፍ መረበሽ፣ ካለፈ ጊዜ ልምድ ጋር ግጭት መፍጠር፣ በናፍቆት ከውጫዊ እና ውስጣዊ ሀይል ጋር መጋጨት፣ ፍርሐት፣ ጭንቀት፣ ከህይወትና ሞት ጋር መፋጠጥ ብሎም ለሞት ሲዳረጉ የታዬ ሲሆን ይህ ደግሞ የሰው ልጅ ፍላጎት ማለቂያ የሌለው፣ በድርጊት የተሞላና ሂደታዊ መሆኑን ጥናቱ አረጋግጧል፡