የዚህ ጥናት አላማ ደጋግሞ ማንበብ ብልሃት የአማርኛ ቋንቋ አንብቦ የመረዳት ችሎታና የማንበብ ተነሳሽነት ለማሳደግ ያለውን አስተዋጽኦ መመርመር የሚል ነው፡፡ ጥናቱ ፍትነት መሰል (Quasi experimental) ንድፍን የተከተለ ነው፡፡ የጥናቱ ተሳታፊዎች በቤኒሻንጉል ጉሙዝ ክልል በአሶሳ ከተማ ውስጥ በሚገኘው የጋማሀሩ አንደኛና መለስተኛ ሁለተኛ ደረጃ ትምህርት ቤት በ2014ዓ.ም በሁለተኛው ወሰነ ትምህርት የሰባተኛ ክፍል በመማር ላይ ከሚገኙ ሰባት የሰባተኛ ከፍሎች መካከል በተራ እጣ ናሙና ሁለቱ የሰባተኛ ክፍሎች የተመረጡ ሲሆን አንደኛው የፍትነት ቡድን ሁለተኛው ደግሞ የቁጥር ቡድን በማድረግ በጥናቱ እንዲሳተፉ ተደርገዋል፡፡ የፍትነቱ ቡድን ተማሪዎች በደጋግሞ ማንበብ ብልሀት ትምህርቱ የሚሰጣቸው ሲሆን የቁጥጥር ቡድኑ ደግሞ ለክፍል ደረጃው በተዘጋጀው በመምህሩ መምሪያና በተማሪው መፅሀፍ መሰረት ትምህርቱ ተግባራዊ ተደርጓል፡፡ በስድስት ሳምንት በአስራሁለት ክፍለ ጊዜ ትምህርቱን እንዲማሩ ተደርጓል፡፡ በጥናቱ መረጃ የተሰበሰበባቸው መሳሪያዎች የቅድመና ድህረ ትምህርት አንብቦ መረዳት ፈተና እና የቅድመና የድህረ ትምህርት የማንበብ ተነሳሽነት መለኪያ የጽሁፍ መጠይቅ ናቸው፡፡ አንብቦ የመረዳት ችሎታና የማንበብ ተነሳሽነት መረጃዎች በነፃ ናሙና ቲ ቴስት ተፈትሸው የተገኘው የድህረ ትምህርት የአንብቦ መረዳት ውጤት t (78) = 6.46 p<.001)ሲሆን በሁለቱ ቡድኖች መካከል የፍትነት ቡድኑ በልጦ ልዩነት አሳይቷል፡፡ ደጋግሞ ማንበብ ብልሃት በተማሪዎች አንብቦ መረዳት ችሎታ ላይ ያሳደረው የተጽእኖ መጠን ኮህንዲ ቀመር ተሰልቶ ውጤቱም 1.45 (በጣም ከፍተኛ) ሆኗል፡፡ በተመሳሳይ የሁለቱ ቡድኖች የድህረ ትምህርትየማንበብ ተነሳሽነት ፁሁፍ መጠይቅ ውጤት በነፃ ናሙና ቲ ቴስት የተተነተነ ሲሆን በተገኘው ውጤት መሰረት ጉልህ ልዩነት መኖሩ ተረጋግጧል ውጤቱም t(48.16) = 14.50 ሲሆን ደጋግሞ ማንበብ ብልሀት በተማሪዎች የማንበብ ተነሳሽነት ላይ ያሳደረው ተፅእኖ መጠን በኮህንዲ ቀመር ተሰልቶ d = 3.61 (በጣም ከፍተኛ ሆኗል)፡፡ የጥናቱን ግኝቶች መሰረት በማድረግም ስነ ትምህርታዊ የመፍቴህ ሀሳቦች ቀርበዋል፡፡ የወደፊት የምርምር አቅጣጫዎችም በጥናቱ ምእራፍ መጨረሻ (ምዕራፍ አምስት) ላይ ተቀምጧል